ياباغي العليا لهـا عشـرة ابنـود
سجل وانا بمليـك واحفـظ عددهـا
من شان مايلحقك عيبـن ومنقـود
احفظ وصاتي والوصـاة اعتمدهـا
اوصيك قبل الجسم يدبي بـه الـدود
في حــفرتـن لابـد نسكـن لــحدهـا
دنيا العنا فيهـا مشاريـب وعـدود
وكم واحدن له حاجتـن ماوجدهـا
عليك بالتقوى ترى العمـر محـدود
واردع هوى النفس الدنيـه وقدهـا
واحفظ صلاتك تكسب الرزق والفود
تكسب مكاسيـب الحيـاة وسعدهـا
وصوم رمضان وزك يالشامخ الطود
ترى البيـوت النايفـه مـن عمدهـا
وجالس هل التوحيد والعز والجـود
واتـرك مقاريـد العبـاد وقردهـا
الي على التفريق ياتونـك احشـود
فصيلتن دب الجهـل فـي جسدهـا
واحسن جوار الجار لو كان مقـرود
وللجـار نفسـك لاتبيـن نكدهـا
والضيف عطه الطيب والطيب مردود
اكسـب جنـاب الطيبيـن وسندهـا
عقب الشحم والبـن قدم لـه العـود
حيثك من الي مـن لفاهـا حمدهـا
وبنت الردي لو هي زلالن وقرهـود
حـذراك تقربهـا وتمسـك بيدهـا
خذ بنت قرمن عند الاجواد محمـود
لا جا نهار الهـوش بيـن ولدهـا
وزلة رفيقك لالفـت دون مقصـود
لاتمسـك الزلـه وهـو ماقصدهـا
ثـلاث مررهـا ولا شـك بشهـود
والرابعه شـب الحطـب لاوردهـا
هذي عشر وان كـان تبغينـي ازود
سجل على عشر الوصايـا وزدهـا
ا لظلم شين وتالـي الظلـم مـردود
والغيظ شيطـان القلـوب وكبدهـا
والصمت زينه والحكي سيف محرود
والحقـد غيمـه والتباغـظ بردهـا
فكر وميز واعرف البيض والسـود
واحذر قلوب الحاسديـن وحسدهـا
يابوك بين الناس طـارد ومطـرود
ماتجهلك بعـض الحـرار وهددهـا
وان ضامتك دنياك واصبحت مضهود
فاطلب من المولـى يحلـل أعقدهـا
الواحد الـي كلبونا لـه اسجـود
الي جميع اعمـال خلقـه رصدهـا
هذي نصيحه وانت معطيني اوعـود
واهل الوفا والعرف توفي وعدهـا
