يازين وقت فات

يا زين وقتن فات ما هوب هااللحين
يوم النوايا كلهن صافياتي
والحقد ما يوجد ودايم سعيدين
ونفوسنا سمحه وسكر نباتي
وبيوتنا وانسه ولا به شياطين
ما يدخله صورة ولا منكراتي
ويطرد ظلام الليل عنا سراجينَ
وأحيان يقضي قازهن طافياتي
مشروبنا صافي من الزير ولبينَ
ما هو بـ مستورد سريع الفواتي
ما صنعوه الغرب يافالهم شين
ما به مواد الحفظ ومسرطناتي
وعشانا مرقوق بين العشاوين
تحطه أمي قبل وقت الصلاتي
لقمة هنية طيبة طعهما زين
تحوفها بيدينها الطاهراتي
ثمن ننام أليا قضينا مصلين
بعد العشا كلن يريد المباتي
وأمي تنومنا بزين السباحين
سوالفن من عندها طيباتي
ننام من بدري ونصحي نشيطين
بعد الشروق أشغالنا جاهزاتي
ما به كسل لاشغالنا مستعدين
ماعندنا سايق ولا خادماتي
نلبس بيوم العيد ثوب السباهين
وأمي تحنينا نماري البناتي
نشب نارن بالشتا ومتدفين
ما فيه دفايات ومكيفاتي
يجي المطر وثيابنا تمتلي طين
ونلّعب جميع عيالنا والبناتي
يصب مثعبنا ونملأ المواعين
ياحلو ذاك الما وذيك الحياتي
ماهي حياة الحين يا شين ها الحين
كله غثا وهمومنا كاثراتي
كلشي يجي لك لو بكلمةٍ تنادين
كلشي توفر بس ما به حلاتي